நில அபகரிப்பு மற்றும் சொத்து மோசடிக்கு எதிரான கடுமையான தண்டனைகள்: ஓர் விரிவான பார்வை

புதிய பாரதிய நியாய சட்டம் (BNS) கீழ் நில அபகரிப்பு மற்றும் சொத்து மோசடிக்கு எதிரான கடுமையான தண்டனைகள்: ஓர் விரிவான பார்வை

Article by V R Saravanan, Advocate, Puducherry, Cell:- 9994854777

 இந்தியாவில் நில அபகரிப்பு மற்றும் சொத்து மோசடிகள் நீண்டகாலமாகவே ஒரு பெரும் சவாலாக இருந்து வருகின்றன. இத்தகைய குற்றங்களைத் தடுக்கவும், பாதிக்கப்பட்டவர்களுக்கு நீதி கிடைப்பதை உறுதி செய்யவும், இந்திய தண்டனைச் சட்டத்திற்கு (IPC) மாற்றாக ஒரு சில பிரிவுகள் விரிவுப்படுத்தி புதிய பாரதிய நியாய சட்டம் (BNS), 2023 அறிமுகப்படுத்தப்பட்டுள்ளது. BNS சட்டத்தின் கீழ் நில அபகரிப்பு மற்றும் சொத்து மோசடி தொடர்பான பல்வேறு குற்றங்களுக்கு கடுமையான தண்டனைகள் விதிக்கப்பட்டுள்ளன. இது பொதுமக்களின் சொத்துக்களைப் பாதுகாப்பதையும், நிலப் பரிவர்த்தனைகளில் வெளிப்படைத்தன்மையை மேம்படுத்துவதையும் நோக்கமாகக் கொண்டுள்ளது.

BNS சட்டத்தின் கீழ் நில அபகரிப்பு மற்றும் சொத்து மோசடி தொடர்பான முக்கிய பிரிவுகள் மற்றும் தண்டனைகளின் சுருக்கம்:

 BNS சட்டமானது, நிலம் மற்றும் சொத்து தொடர்பான மோசடிகளை பல்வேறு வகைகளாகப் பிரித்து, ஒவ்வொரு குற்றத்திற்கும் குறிப்பிட்ட தண்டனைகளை வரையறுத்துள்ளது. அவை பின்வருமாறு:

 1.  போலியான ஆவணம் மூலம் சொத்தை அபகரித்தல் (BNS 335):

 பிறரது சொத்தை தனது என்று கூறி, போலியான ஆவணங்களைத் தயாரித்து விற்பனை செய்பவர்களுக்கு 5 ஆண்டுகள் வரை சிறை தண்டனை விதிக்கப்படும். இது நில அபகரிப்புக்கு எதிரான ஒரு முக்கியமான தடுப்பு நடவடிக்கையாகும்.

2.  சொத்து மோசடி - ஆள் மாறாட்டம் (BNS 319(2)):

வேறொருவரின் சொத்தை தனது சொத்து என்று சொல்லி, ஆள் மாறாட்டம் செய்து விற்பனை செய்யும் நபர்களுக்கு 7 ஆண்டுகள் வரை சிறை தண்டனை விதிக்கப்படும். இது சொத்து பரிவர்த்தனைகளில் ஏற்படும் முக்கிய மோசடிகளில் ஒன்றாகும்.

 3. போலி ஆவணத்தை தெரிந்தே விற்றல் (BNS 340(2)):

தான் விற்கும் ஆவணம் போலி என்று தெரிந்தும் அதை பிறருக்கு விற்பனை செய்பவர்களுக்கு 7 ஆண்டுகள் வரை சிறை தண்டனை விதிக்கப்படும். இது தெரிந்தே செய்யப்படும் மோசடிகளுக்கு எதிரான கடுமையான நடவடிக்கையாகும்.

 4.  கடன் கொடுப்பதாக கூறி நில பத்திரத்தை கைப்பற்றி விற்றல் (BNS 319, 335, 340(2)):

கடன் வாங்கித் தருவதாகக் கூறி, பிறரின் அசல் நிலப் பத்திரங்களை மோசடியாகக் கைப்பற்றி, அவற்றை தனது சொத்து என்று கூறி விற்பனை செய்யும் நபர்களுக்கு 7 ஆண்டுகள் வரை சிறை தண்டனை விதிக்கப்படும். இது பொதுமக்களின் நிதிச் சுரண்டலைத் தடுப்பதை நோக்கமாகக் கொண்டுள்ளது.

 5.  பிறர் நிலத்தை தனது என்று கூறி வாடகை வசூலித்தல் (BNS 314):

பிறரின் சொத்தை தனது சொத்து என்று கூறி வாடகைக்கு விடக்கூடிய நபர்களுக்கு 2 ஆண்டுகள் வரை சிறை தண்டனை விதிக்கப்படும். இது வாடகை வருவாய் தொடர்பான மோசடிகளுக்கு எதிரான பாதுகாப்பை வழங்குகிறது.

 6.  ஒரே சொத்தை பலருக்கு விற்றல் (Double Selling) (BNS 319(2), 335, 340(2)):

ஒரு சொத்தை இரண்டுக்கும் மேற்பட்ட நபர்களுக்கு மோசடியாக விற்பனை செய்யும் நபர்களுக்கு 7 ஆண்டுகள் வரை சிறை தண்டனை விதிக்கப்படும். இது சொத்து சந்தையில் நம்பகத்தன்மையை உறுதி செய்கிறது.

7.  சகோதரர் சொத்தை தனது என்று கூறி அடைத்தல் (BNS 319(2), 335, 340(2)):

அண்ணன் அல்லது தம்பியின் சொத்தை தனது என்று கூறி மோசடியாக அடைகரிக்கும் நபர்களுக்கு 7 ஆண்டுகள் வரை சிறை தண்டனை விதிக்கப்படும். இது குடும்ப சொத்துக்களின் பாதுகாப்பை உறுதி செய்கிறது.

8.  அத்துமீறி நுழைந்து கட்டிடம் எழுப்புதல் (BNS 314, 329(1), 329(3)):

தனது இடம் என்று கூறி, பிறரின் இடத்தில் அத்துமீறி நுழைந்து வீடு கட்டக்கூடிய நபர்களுக்கு 2 ஆண்டுகள் வரை சிறை தண்டனை விதிக்கப்படும். இது அத்துமீறலைத் தடுக்கும் முக்கிய பிரிவாகும்.

 9.  அருகிலுள்ள நிலத்தை தனது என்று கூறி விற்றல் (BNS 314, 319(2), 335, 340(2)):

 தனது இடத்தை விற்காமல், பக்கத்து இடத்தை தனது என்று கூறி விற்பனை செய்யும் நபர்களுக்கு 7 ஆண்டுகள் வரை சிறை தண்டனை விதிக்கப்படும். இது நில எல்லைகள் தொடர்பான மோசடிகளைத் தடுக்கிறது.

10. சொத்து அடையாளத்தை அழித்து ஆக்கிரமித்தல் (BNS 314, 329(1), 329(3), 346):

 பிறரின் சொத்தின் அடையாளங்களான எல்லைக் கற்கள் அல்லது பிற அடையாளங்களை அழித்து அச்சத்தில் ஆக்கிரமிப்பு செய்யும் நபர்களுக்கு 2 ஆண்டுகள் வரை சிறை தண்டனை விதிக்கப்படும். இது சொத்து எல்லைகளைப் பாதுகாப்பதை உறுதி செய்கிறது.

 முக்கிய குறிப்புகள்:

 பாரதிய நியாய சட்டம் (BNS) என்பது இந்திய தண்டனைச் சட்டத்தை (IPC) மாற்றியமைக்கப்பட்ட புதிய சட்டமாகும், இது 2023 இல் அறிமுகப்படுத்தப்பட்டது. நில மோசடி தொடர்பான குற்றங்களுக்கு இந்த புதிய சட்டம் கடுமையான தண்டனைகளை (2 முதல் 7 ஆண்டுகள் வரை சிறை) விதிக்கிறது. உண்மையான சொத்து உரிமையாளர்கள் போலி ஆவணங்கள் மற்றும் மோசடிகளிலிருந்து பாதுகாக்கப்படுவதை BNS சட்டம் உறுதி செய்கிறது.

நீதிமன்றத்தில் நடவடிக்கை எடுக்க என்ன செய்ய வேண்டும் ?

நீங்கள் நில அபகரிப்பு அல்லது சொத்து மோசடியால் பாதிக்கப்பட்டிருந்தால், உடனடியாக உள்ளூர் காவல் நிலையத்தில் புகார் அளிக்கலாம் அல்லது சிவில் வழக்கு தாக்கல் செய்யலாம். BNS சட்டம், நிலம் மற்றும் சொத்து தொடர்பான குற்றங்களுக்கு எதிராக ஒரு வலுவான சட்ட கட்டமைப்பை உருவாக்குகிறது. இது பொதுமக்களுக்கு பாதுகாப்பளிப்பதுடன், சட்டவிரோத நடவடிக்கைகளைத் தடுத்து, நியாயமான மற்றும் வெளிப்படையான சொத்து பரிவர்த்தனைகளை ஊக்குவிக்கும் என்று எதிர்பார்க்கப்படுகிறது. 

மேலும் வெளிநாட்டில் வாழ் இந்தியர்கள் அவர்களது சொத்தை பாதுகாக்க புகார்களை ஆன்லைன் மூலம் தருவதற்கான ஏற்பாட்டை புதிய சட்டம் வழிவகை செய்துள்ளது. மேலும் நீதிமன்றத்தில் வீடியோ கான்ஃபரன்ஸ் மூலமாக சாட்சியம் அளிக்கவும் சாட்சிய சட்டத்தில் இணைப்பு ஏற்பட்டுள்ளது. புதிய நடைமுறை சட்டங்களை பொதுமக்கள் பயன்பெறுமாறு கேட்டுக்கொள்கிறேன்.

கட்டுரை 

இரா. சரவணன் 
வழக்கறிஞர் 
புதுச்சேரி 
செல் :- 9994854777